សេចក្តីប្រកាសព័ត៌មានស្តីពី លទ្ធផលអង្កេតស្រាវជ្រាវករណីបណ្តឹងសុំអន្តរាគមន៍របស់លោកស្រី សែម សុខគា ពាក់ព័ន្ធករណីដីធ្លីនៅតំបន់អន្ទង់អាំង (ភ្នំ១៥០០) ខេត្តពោធិ៍សាត់
១-អ្នកនាំពាក្យនៃក្រសួងយុត្តិធម៌ សូមជម្រាបជូនសាធារណជន និងបណ្តាញផ្សព្វផ្សាយព័ត៌មានទាំងអស់មេត្តាជ្រាបថា៖ កាលពីថ្ងៃទី១៤ ខែមីនា ឆ្នាំ២០២៥, ក្រសួងយុត្តិធម៌បានទទួលបណ្ដឹងពីលោកស្រី សែម សុខគា ស្នើសុំអន្តរាគមន៍ស្វែងរកយុត្តិធម៌ ជុំវិញករណីដីធ្លីនៅតំបន់ភ្នំ១៥០០ ខេត្តពោធិ៍សាត់។ បន្ទាប់ពីបានទទួលបណ្ដឹងនេះ, ក្រសួងយុត្តិធម៌បានចាត់ក្រុមការងារមួយ ចុះទៅអង្កេតស្រាវជ្រាវស្វែងរកការពិតជុំវិញរឿងនេះ ដើម្បីមានមូលដ្ឋានច្បាស់លាស់ក្នុងការពិនិត្យ និងដោះស្រាយបណ្ដឹងអន្តរាគមន៍របស់លោកសី
សែម សុខគា។
២-ក្នុងការស្រាវជ្រាវស្វែងរកការពិតចំពោះករណីនេះ, ក្រុមការងារក្រសួងយុត្តិធម៌ក៏បានអញ្ជើញលោកស្រី សែម សុខគា ដែលជាម្ចាស់បណ្តឹង រហូតដល់ទៅ ៣លើក ដើម្បីសាកសួរព័ត៌មានលម្អិតបន្ថែមទៀត។ លើសពីនេះ, ក្រសួងយុត្តិធម៌បានធ្វើលិខិតទៅប្រធានសាលាដំបូងខេត្តពោធិ៍សាត់ និងព្រះរាជអាជ្ញាអមសាលាដំបូងខេត្តពោធិ៍សាត់ ស្នើសុំឱ្យបង្អង់នីតិវិធី ដើម្បីផ្ដល់នូវការធានា និងបង្កលក្ខណៈល្អប្រសើរឱ្យលោកស្រី សែម សុខគា អាចចូលមកបំភ្លឺលើបណ្តឹងស្នើសុំអន្តរាគមន៍របស់លោកស្រី។ ប៉ុន្តែ លោកស្រី សែម សុខគា នៅតែមិនបានចូលមកផ្ដល់ព័ត៌មានបន្ថែម តាមការអញ្ជើញរបស់ក្រសួងយុត្តិធម៌ ចំពោះការស្រាវជ្រាវស្វែងរកការពិតនៅក្នុងបណ្តឹងដែលខ្លួនបានស្នើសុំអន្តរាគមន៍ស្វែងរកយុត្តិធម៌នោះឡើយ។
